Име на проектот: „Меѓуопштински партнерства за подобра испорака на јавни услуги“

Локација: Босилово, Василево и Ново Село

Краток опис:

Целта на проектот беше да се даде придонес кон подобрување на квалитетот на испораката на јавните услуги на локално ниво преку унапредување на меѓуопштинската соработка. Активностите на Проектот беа структурирани така што се обезбеди поддршка при воспоставувањето на заедничко одделение од областа на инспекциските работи во општина Босилово, одделение за локални даноци и такси во општина Василево и одделение за урбанизам во општина Ново Село. Овие одделенија испорачуваа услуги за граѓаните од трите општини а пристапот на граѓаните до тие услуги беше обезбеден преку сопствената општина. Дополнително се обезбеди и воспоставување на две заеднички надлежности – внатрешна ревизија и ИТ. Исто така, активностите на Проектот беа насочени и кон воспоставување на Центар за услуги на граѓаните во секоја општина којшто обезбедува услуги преку интернет и преку други механизми, но и кон креирање на модели и решенија базирани на web-платформа за пристап до информации и воспоставување на мрежа меѓу трите општини.

Тематска област: Децентрализација

Статус на проектот: Завршен

Донатор: Влада на Кралството Норвешка

Период на спроведување на проектот: септември 2006 – септември 2009

Придобивки:

Трите општини, Босилово, Василево и Ново Село директно ги почувствуваа придобивките од воспоставувањето на трите потполно функционални заеднички одделенија за испорака на децентрализирани јавни услуги од областа на инспекцијата, даночното управување и урбанизмот. Покрај тоа, проектот ги поддржа воспоставувањето на две дополнителни надлежности – внатрешна ревизија и ИТ. Овие заеднички одделенија нудат испорака на поефикасни и економични јавни услуги. Доколку овие три општини, секоја поединечно воспоставеше свои одделенија, трошоците за дополнителните 24 вработени (според законската регулатива), ќе беа 230.400 ЕУР (75.000 – 80.000 евра по општина годишно). И доколку општините одлучија да не стапат во меѓуопштинска соработка за испорака на заеднички услуги, ќе постоеа две можни сценарија: 1. општините ќе имаа вакуум во испораката на јавните услуги бидејќи нивните буџети не ќе можеа да поддржат вработување на толку многу персонал, и 2. доколку, пак, општините би успеале да ги обезбедат средства за вработување на потребниот персонал, тоа негативно би се одразило на извршувањето на другите општински функции.

Исто така, трите потполно опремени и функционални центри за услуги на граѓаните, кои служат како предни канцеларии за повеќе од 40.000 граѓани од териториите на трите општини, се значајна придобивка за општините и нивните граѓани. Преку овие центри граѓаните ползуваат потранспарентно и отчетно владеење и побрза, поефикасна и со поголем квалитет испорака на јавните услуги, но и подобрена реакција во решавањето на нивните проблеми со користење на заштедите кои произлегуваат од постоењето на заедничката администрација.

Што е постигнато:

• Комплетирана ИТ инфраструктура во трите општини;
• Развиени се методологијата и алатките за спроведување на организациската поставеност. Подготвени се функционална анализа, организациска структура и опис на работните места за вработените во Центрите за услуги на граѓаните (ЦУГ), спроведена е опсежна функционална анализа;
• Поддржано е спроведувањето на детална регистрација на имотите на даночните обврзници на територијата на трите општини и  ажуриран регистерот на недвижен имот за околу 10.000 даночни обврзници;
• Креиран и инсталиран дополнителен модул за софтверот за урбанизмот;
• Проектот обезбеди по едно возило за секоја општина за да се овозможи подобра мобилност на персоналот;
• За претставниците од трите општини беше организирано студиско патување во Република Грција со цел да се посетат граѓанските услужни центри во грчките општини, коишто се сметаат за едни од најнапредните во Европа во смисол на ефикасност и разнообразност на испорачаните услуги, и да се стекнат знаења од нивните практики;
• Трите општини беа поддржани во создавањето на подобри услови за поодржлив иден развој (урбанистички планови);
• Во 2008, меѓуопштинската соработка беше проширена со две дополнителни заеднички надлежности – заеднички државен службеник за ИТ поддршка, со канцеларија  во општина Ново Село, и заеднички внатрешен ревизор, со канцеларија во општина Василево;
• Во трите општини беа формирани, отворени и потполно операционализирани центрите за услуги на граѓаните (ЦУГ);
• Во периодот од мај 2008 година до јануари 2009 година, преку Центрите за услуги за граѓаните беа испорачани преку 2000 услуги, повеќето од нив беа процесирани од одделенијата за даноци, урбанизам и инспекција.
• Предните канцеларии (Граѓанските услужни центри) и соодветните задни канцеларии (зедничкото даночно, урбанистичко и инспекциско одделение) беа електронски интегрирани во еден Систем за управивање со документи, којшто беше изработен да одговара на специфичните потреби на оваа меѓуопштинска соработка;
• Беше спроведено и студиско патување во Република Бугарија кадешто од страна на Здружението на југоисточните општини на Бугарија беше организиран форум за меѓуопштинската соработка и искористување на фондовите на ЕУ за претставници од министерствата и стручните лица од општините од двете земји;
• Меѓуопштинската соработка на општините Босилово, Василево и Ново Село беше промовирана на меѓународната конференција за меѓуопшинска соработка во Италија, во Бугарија, на Саемот за општини во Германија, како и во земјата. Оаа практика на меѓуопштинска соработка претставува основен модел за другите рурални општини во земјата;
• Исто така беше обезбедена техничка помош на Министерството за локална самоуправа во подготовката на Прирачник за меѓуоопштинска соработка и во подоготовката на нацрт Законот за меѓуопштинска соработка;
• Во 2008 година, проектот беше награден како најдобра практика во категоријата на подобрен квалитет на испорака на локални услуги од страна на Советот на Европа, ЗЕЛС, Европската агенција за реконструција, УСАИД и Министерството за локална самоуправа