Прв состанок на Комисијата за меѓуопштинска соработка

Согласно Законот за меѓуопштинска соработка, Владата на Република Македонија формира Комисија за поттикнување и следење на меѓуопштинската соработка. Оттаму, на 2 февруари 2010 година, Владата донесе Одлука за формирање Комисија за поттикнување и следење на меѓуопштинската соработка составена од 18 членови.

Комисијата за поттикнување и следење на меѓуопштинската соработка ги следи воспоставените облици на меѓуопштинска соработка, го разгледува и дава мислење по годишниот извештај за остварувањето на меѓуопштинската соработка, иницира измени и дополнувања на законската регулатива која влијае на меѓуопштинската соработка, дава мислење по предлозите на актите од членот 32 ставови (2) и (4) на Законот за МОС, објавува најдобри примери на меѓуопштинската соработка и разгледува и други прашања од значење за меѓуопштинската соработка.

На првиот состанок одржан на 5 март 2010 година, Комисијата за меѓуопштинска соработка го усвои Извештајот за остварување на меѓуопштинска соработка во 2009 година со следните заклучоци:

-Комисијата да утврди критерериуми за идентификување на примери на најдобра домашна пракса и пракса од земјите членки на ЕУ,
-Надлежните министерства да направат проценка за полезноста од воспоставување на меѓуопштинска соработка во одредени области заради поефективно извршување на надлежностите од страна на општините.

Комисијата го разгледа и текстот на Уредбата за утврдување на областите од пошироко значење, во кои Владата би ја поттикнувала меѓуопштинската соработка со доделување на финансиски средства. Областите ќе бидат определени врз основа на методологија која што ќе ги има предвид приоритетите на Владата, потребите на општините, како и приоритетите кои што произлеглегуваат од политиките за интегрирање во ЕУ.

Државниот секретар на Министерството за локална самоуправа, Андријана Стојановска, претседател на Комисијата, истакна дека по донесувањето на Законот и на подзаконските акти кои што се во фаза на усвојување, се очекува во оваа 2010 година да се зголеми бројот на иницијативи за воспоставување на меѓуопштинска соработка.

УНДП, преку Програмата за меѓуопштинска соработка, во континуитет ќе ја поддржува работата на Комисијата и ќе се грижи за градење на капацитетите на истата.

Обука за постапка и обрасци за воспоставување на меѓуопштинска соработка

Програмата за меѓуопштинска соработка на УНДП продолжува со континуирана поддршка на имплементацијата на воспоставените меѓуопштински соработки преку давање упатства и овозможување стручна помош.

Во таа насока, Програмата на УНДП организира еднодневна обука за постапката и обрасците за воспоставување на меѓуопштинска соработка. Обуката за постапката за воспоставување се темели на законската обврска, а обрасците кои се неопходни во истата се развиени од стручна група во тесна соработка со Министерството за локална самоуправа.

Обуката ќе се одржи на 10 март 2010 година, со почеток во 10:00 часот во хотел „Арка„ во Скопје.

Содржински, обуката е конципирана во три модули кои ја опфаќаат Програмата на УНДП за МОС и Законот за МОС, како и модули во кои се обработуваат обрасците од општата и посебната постапка за воспоставување на МОС.

За успешно имплементација на постапката за воспоставување на меѓуопштинска соработка согласно Законот за меѓуопштинска соработка,  од суштинско значење е на обуката да учествуваат:

-лицата за контакт на проектот за МОС

-по еден државен службеник одговорен за правните работи од секоја општина, и

-по еден член на советот на општинита (претседателот на совет или член на совет).

За сите подетални информации во врска со обуката обратете се во канцеларијата на Програмата за МОС на УНДП, преку е-mail: This e-mail address is being protected from spambots. You need JavaScript enabled to view it или по телефон на следниов број: 02 3226-018, лок. 112 и факс 02 3226-019.